Aukin þjónusta

2.2.2019

Baekur_bokahillurBókasöfn Hafnarfjarðar, Garðabæjar og Kópavogs eru samstarfssöfn og frá og með 1. febrúar 2019 mega lánþegar þessara safna skila bókum og öðrum gögnum sem þeir hafa í láni á hverju þessara samstarfssafna sem er.

Samstarfssamningur Bókasafns Garðabæjar, Bókasafns Hafnarfjarðar og Bókasafns Kópavogs

Haustið 2017 endurnýjuðu Bókasafn Garðabæjar, Bókasafn Hafnarfjarðar og Bókasafn Kópavogs samstarfssamning sinn til næstu ára, en samstarfið hófst upphaflega árið 2005. Forstöðumenn safnanna undirrituðu samninginn á sínum tíma, en í honum felst að lánþegar safnanna mega nýta skírteini sín hjá báðum hinum samstarfssöfnunum. Þetta eru fimm starfsstöðvar í allt - ein í Hafnarfirði og tvær bæði í Kópavogi og Garðabæ. „Því hafa lánþegar aðgang að söfnum sem dreifast á stórt svæði og samanlögðum safnkosti allra bæjarfélaganna, en greiða árgjaldið bara á einum stað,“ segja forstöðumennirnir Lísa Z. Valdimarsdóttir í Kópavogi, Margrét Sigurgeirsdóttir í Garðabæ og Óskar Guðjónsson í Hafnarfirði. 

Skil á gögnum á hvaða samstarfssafni sem er

Í byrjun þessa árs tóku forstöðumenn safnanna ákvörðun um að auka samstarfið enn frekar með því að bjóða lánþegum að skila gögnum sem þeir eru með í láni á hvaða samstarfssafni sem er. Þetta þýðir að lánþegi sem fær gögn lánuð í einhverju samstarfssafnanna getur valið um það hvort hann skilar þeim á Bókasafninu í Hafnarfirði, Bókasafninu í Garðabæ eða Bókasafninu í Kópavogi. Um er að ræða tilraunaverkefni til sex mánaða og hefst það um mánaðamótin janúar/febrúar. 

Sameiginlegir viðburðir

Auk samstarfs um aukna þjónustu í skilum á gögnum munu söfnin þrjú taka sig saman og standa reglulega fyrir sameiginlegum erindum og fræðslu. Sölvi Tryggvason, sjónvarpsmaður, mun halda fyrsta erindið um betri heilsu og innihaldsríkara líf. Erindið mun fara fram á öllum þremur söfnunum. Mánudaginn 4. febrúar mun Sölvi koma á Bókasafn Hafnarfjarðar, þriðjudaginn 5. febrúar á Bókasafn Garðabæjar og þriðjudaginn 12. febrúar á Bókasafn Kópavogs. Öll erindin fara fram kl. 17:00 og er aðgangur ókeypis.


Bókasafn Hafnarfjarðar | Strandgötu 1, 220 Hafnarfirði
Sími 585-5690 | Netfang bokasafn@hafnarfjordur.is