Afgreiðslusalur 1. hæð

Afgreiðsla

Í afgreiðslu eru þrjár afgreiðslutölvur auk sjálfsafgreiðsluvélar. Starfsfólk er boðið og búið að aðstoða, jafnt við að afgreiða fólk sem og að kenna á sjálfsafgreiðsluvélina.

Útlánareglur

• Hver lánþegi fær skírteini þegar hann gengur í safnið og framvísa verður því í hvert skipti til að fá bækur eða önnur gögn að láni. Skírteinið gildir einungis fyrir eiganda þess.

• Börn og unglingar innan 18 ára fá ókeypis skírteini gegn ábyrgð forráðamanns. Óheimilt er að lána fullorðnum gögn út á barnaskírteini. Eldri borgarar og öryrkjar fá einnig ókeypis skírteini en aðrir greiða árgjald.

• Hver lánþegi ber ábyrgð á öllum þeim gögnum sem tekin eru að láni út á skírteini hans. Glatist safngagn eða skemmist í vörslu lánþega ber honum að skýra frá því og greiða bætur samkvæmt gjaldskrá.

• Lánstími gagna er mismunandi eftir tegund gagns. Við hvetjum viðskiptavini bókasafnsins til þess að fylgjast vel með skiladegi sinna gagna því ef ekki er skilað á réttum tíma greiðast dagsektir.

• Skilvísi og góð meðferð á safngögnum er grundvöllur góðs bókasafns.

Nýjar bækur

Allar nýjar bækur eru á jarðhæðinni. Skáldsögur og ævisögur eru hafðar á 1. hæðinni í 1 1/2 ár, fræðibækur í 6 mánuði. Eftir það eru bækurnar fluttar á sína staði.

Sakamálasögur í kilju og Rauða serían (nýjustu árin) eru einnig á 1. hæðinni.

Hljóðbækur

Skáldsögur og ævisögur á hljóðbókum eru hafðar við lyftu á 1. hæðinni. Hljóðbækur eru á snældum, geisladiskum og MP3-diskum.

• Hægt er að spila MP3-diska í geislaspilurum sem eru gerðir fyrir MP3. 

• Einnig er hægt að nota DVD spilara eða tölvur til þess að hlusta á MP3-diska.

Tímarit

Nýjustu tölublöð tímarita eru ekki til útláns heldur sett í möppur svo fólk geti blaðað í þeim í rólegheitunum í setustofunni. Strax og nýtt tölublað berst til okkar er því svo skipt út og eldra heftið fer í útlán. 

Í setustofunni eru tímaritakassar með eldri heftum af:

• dægurblöðum á íslensku, ensku, dönsku, norsku og þýsku

• húsbúnaðarblöðum

DVD-myndir og myndbönd

Bókasafnið á mikið úrval af myndböndum og mynddiskum, bæði fræðslumyndum og afþreyingarmyndum. 

• Útlán á DVD-diskum eru gjaldfrjáls. Útlánstíminn er misjafn, frá 2 dögum til 14 dögum. 

• Megináhersla er lögð á að kaupa inn íslenskar myndir, barnaefni, fjölskyldumyndir, valdar verðlaunamyndir og þær myndir sem vinsælastar hafa verið í kvikmyndahúsunum.

• Séu kvikmyndir, sem annars eru með 2 daga lánstíma, fengnar að láni á fimmtudegi eða föstudegi þarf ekki að skila þeim fyrr en á mánudegi (fyrir klukkan 19:00).
• Ekki má skila geisladiskum eða DVD-myndum í skilalúgu vegna hættu á skemmdum.

• Dagsektir á DVD-myndum er 200 kr. á dag. 

Leita í Internet Movie Database

Leita að myndböndum á Gegnir.is (velja Tegund efnis neðarlega til hægri)

Reglur Bókasafns Hafnarfjarðar um útlán á myndefni til grunnskóla, frístundaheimila grunnskóla og leikskóla í Hafnarfirði

Kennarar í grunnskólum og leikskólum Hafnarfjarðar og ábyrgðarmenn frístundaheimila grunnskólanna geta tekið mynddiska að láni til að nota við kennslu. Ekki er lánað út nýtt efni. Einungis er reiknað með venjulegum útlánstíma á þessu efni nema um annað sé samið sérstaklega við deildarstjóra mynddeildar.

• Útlánstími kvikmynda er vika en ef þörf krefur ef hægt að semja um lengri útlánstíma við deildarstjóra mynddeildar. Nýjustu kvikmyndirnar eru hins vegar með 2 daga lán. 
  
• Allt fræðslumyndefni er lánað út í 14 daga 
  

Stofnað er kort með nafni skólans og viðkomandi kennara / ábyrgðarmanns þannig að hann tekur persónulega ábyrgð á hverju því sem hann fær að láni. Ekki mega aðrir taka út á kortið en sá sem er skráður fyrir því – og mögulega samstarfsmenn sem ábyrgðarmaðurinn hefur gefið heimild í gegnum deildarstjóra mynddeildar.

Þessar reglur eiga eingöngu við um hafnfirska skóla (þ.m.t. Hjallastefnuna) og frístundaheimili grunnskólanna. Húsið (áður Gamla bókasafnið), Flensborgarskóli – starfsbraut og Iðnskólinn í Hafnarfirði – framhaldsskóladeild hafa einnig sambærilegan rétt til útlána. Ef kennarar úr öðrum skólum utan Hafnarfjarðar taka gjaldskylt efni þurfa þeir að greiða fyrir það sjálfir og venjulegur útlánstími gildir fyrir það efni, nema um annað sé samið sérstaklega við deildarstjóra mynddeildar. 

Tónlistardeild:

Mynddiskar á tónlistardeild eru lánaðir í 14 daga, án endurgjalds.

Geisladiskar með tónlist eru lánaðir í 14 daga, án endurgjalds.